നാക്കിന്റെ കെട്ട് (tongue tie )

"വാണീ ദേവി വന്നു വിളങ്ങിടേണം നാവിൻ തുമ്പിൽ "

നാവെന്ന വാക്കു കേൾക്കുമ്പോ  ഒരു മലയാളിയുടെ മനസ്സിൽ ആദ്യം ഓടിയെത്തുന്നതൊരു സരസ്വതി സ്തുതി  ആയിരിക്കും.ജാതി മതത്തിനതീതമായി തന്നെ.
അഴീക്കോട് മാഷെപ്പോലുള്ള പ്രഭാഷക പ്രതിഭകളുടെ ചന്തകൾ , നമ്മുടെ സ്വന്തം ദാസേട്ടന്റെ,റഫീസാഹേബിന്റെ ,എം എസ സുബ്ബലക്ഷ്മിയുടെ സംഗീതം നമ്മുടെ കാതുകളിൽ മഴയായ്‌പെയ്തതും,  അവരുടെ അനുഗ്രഹീത നാവുകളിൽ നിന്ന്.

മൗനങ്ങളിൽ  ,  പല്ലുകളുടെ വേലിക്കെട്ടിനകത്തു   ഒരു പിടക്കോഴിയെകൂട്ട്പൊരുന്നയിരിക്കുന്ന നാവ്, പൊടുന്നനെ  ഒരു പ്രഗല്ഭ നർത്തകന്റെ ചടുലതയോടെ ചലിക്കും. 
  
ഗോൾ പോസ്റ്റ് കാക്കുന്ന ഗോളിയെ പോലെ ഒരറ്റത്ത് നിന്ന് മറ്റേയറ്റത്തേക്കു കുതിച്ചു മറിയും.

ഒപ്പം ചേരുന്ന മറ്റു രണ്ടു കലാകാരൻമാർ ആയ ചുണ്ടുകൾക്കും അണ്ണാക്കിനും ഒപ്പം പരസ്പരം ആസ്വദിച്ചു താളമറിഞ്ഞു , ഇത്തിരി താഴെ  തൊണ്ടയിൽ നിന്ന് ഉറവെടുക്കുന്ന മനോഹര ശബ്ദത്തിൽ നിന്ന് വാക്കുകൾക്കു ജന്മം നൽകും.

വാക്കുകൾ കൊണ്ട് മായാ പ്രപഞ്ചം ഒരുക്കുക മാത്രമല്ല, വേരൊരുപാട് വ്യത്യസ്ത ജോലികൾ കൂടിയുണ്ട് മൂപ്പർക്ക്.

• രുചിയറിഞ്ഞു ആഹാരം കഴിക്കുന്നവർക്കറിയാം, അസുഖം വരുമ്പോ ഇത്തിരി നാളുകളിൽ നാവിന്റെ രുചി പോയാൽ ഉള്ള അസഖിത . ചിലരൊക്കെ ജീവിക്കുന്നതേ രുചിയറിഞ്ഞു ആഹരിക്കാൻ മാത്രം ആണെന്ന് തോന്നും. ഈ നർത്തകന്റെ കുപ്പായപ്പുറം ആകെ രുചി മുകുളങ്ങൾ ആണ്.കയ്പ്പും ചവർപ്പും  മധുരവും പുളിയും വേറിട്ടറിയാൻ.
• ചുറ്റിലും ഉള്ള പല്ലുകൾ ആട്ടുകല്ലുകൾ ആയി മാറി ആഹാരത്തെ അരച്ച് കഴിയുമ്പോൾ ഇത്തിരി ഉമിനീരും ചേർത്ത് പാകത്തിന് കുഴച്ചു കൊടുക്കാനും,പല്ലുകൾക്കിടയിലും കവിളിനിടയിലും പെട്ടുപോവുന്ന വറ്റുകൾ തോണ്ടിയെടുത്തു  അരവുകാർക്ക് ഇട്ടു കൊടുക്കാനും  ഒടുവിൽ ഇത്തിരി ഒന്ന് പുറകോട്ടാഞ്ഞു തൊണ്ടയിലേക്കു വെച്ച് കൊടുത്തു ഇറക്കാൻ സഹായിക്കാനും ഒക്കെ നാവു വേണം.
• ഭക്ഷണ പദാർത്ഥങ്ങളിൽ ചിലതു ചവച്ചരച്ചു കഴിക്കുമ്പോൾ മറ്റു ചിലതു നാവിന്റെ തുഞ്ചം കൊണ്ട് പതിയെ നുണഞ്ഞു കഴിക്കും. ഐസ് ക്രീം നുണഞ്ഞു കഴിക്കാതെ കോരിയെടുത്തു കഴിക്കുന്നതിൽ അരസികത ഒന്നോർത്തു നോക്കൂ.
• യൗവ്വനാരംഭത്തോടെ പുറം കാഴ്ചയിൽ മുഖ സൗന്ദര്യത്തിൽ. ഒക്കെ താൽപ്പര്യം വരുമ്പോ ആവും തൊണ്ടിപ്പഴമൊത്ത ചുണ്ടുകളും മുല്ലപ്പൂ പോലത്തെ പല്ലുകൾക്കും ഒപ്പം സൗന്ദര്യ സങ്കൽപ്പങ്ങളിൽ നാവിനും ഉണ്ട് സ്ഥാനം.
• പങ്കാളികൾക്കു ചുംബനങ്ങൾ നൽകുമ്പോഴും,ലൈംഗികതയിലെ നാവു വഹിക്കുന്ന സ്ഥാനം വലുത്

ബഹുമുഖ പ്രതിഭ എന്ന വാക്കിനു ശരീരാവയവങ്ങളിൽ എന്ത് കൊണ്ടും യോഗ്യത നാവിനു തന്നെ.

പക്ഷെ ഈ നാവിന്റെ ചടുലതയോടെ ഉള്ള ചലനങ്ങൾക്ക് വിലങ്ങ് വീണാൽ ഉള്ള അവസ്ഥ ഒന്നാലോചിച്ചു നോക്കൂ

ആരോഗ്യവാനായ ഒരു വ്യക്തിക്ക് അപകടങ്ങളിൽ പെട്ടോ കാൻസർ വന്നു പാതി മുറിച്ചു മാറ്റിയോ ഒക്കെ നാക്കിന്റെ ചലനങ്ങൾ ബാധിക്കാറുണ്ട്. പക്ഷെ അങ്ങനെ അല്ലാതെ പിറവി എടുക്കുമ്പോ തൊട്ടുള്ളൊരു ഇത്തിരി പ്രശ്നം കൊണ്ടിങ്ങനെ സംഭവിക്കാം. അത്തരം അവസ്ഥയാണ് "നാവിന്റെ കെട്ടു" എന്ന് നമ്മൾ അറിയുന്ന "tongue tie"

ഒരു കണ്ണാടിയുടെ മുന്നിൽ ചെന്ന് മേൽപ്പല്ലുകളുടെ അറ്റം നാക്കു കൊണ്ട് തൊടാൻ ശ്രമിക്കൂ. മേൽപ്പല്ലുകൾ മാത്രമല്ല, മേൽചുണ്ടും എന്തിനു ചിലർക്കൊക്കെ സ്വന്തം മൂക്കിന്റെ അറ്റം വരെ തൊടാൻ ആവും. വള്ളിട്രൗസറും ഇട്ടു നടക്കുന്ന നാളുകളിൽ "മൂക്കോണ്ടു  നാവു തൊടാൻ പറ്റുവോന്നു"വെല്ലുവിളിച്ചു, അങ്ങനെ ചെയ്തുപെരുമ കാട്ടുന്നൊരു   കൂട്ടുകാരൻ നിങ്ങൾക്കും കാണും.


അപ്പോൾ നാവിന്റെ അടിഭാഗത്തു നിന്ന് താഴോട്ട് ഒരു കട്ടിയുള്ളതെങ്കിലും നേരിയൊരു പാട കാണും. നമ്മളിൽ പലരിലും നാവു പുറത്തേക്കിടുന്നതിന് ഇത് തടസ്സപ്പെടുത്തുന്നില്ല.പക്ഷെ ചിലരിൽ ഈ പാട നാവിന്റെ തുമ്പിലേക്കു കടന്നു നിൽക്കുന്നത് കൊണ്ട് കീഴ്താടിയിലെ പല്ലിന്റെ അറ്റം വരെയൊക്കെയേ മുന്നോട്ടു നീട്ടാൻ അനുവദിക്കൂ. അപ്പോഴേക്കും ഈ കെട്ടു നാവിന്റെ അറ്റം കൂർപ്പിക്കാൻ ആവാതെ നടുവിൽ ഒരു കുഴി ബാക്കി വെക്കും. M എന്നെഴുതിയ പോലെ.

എന്താണിതിനു കാരണം?

അമ്മയുടെ ഉള്ളിൽ ഇരിക്കുമ്പോഴും പ്രസവിച്ചു വീഴുമ്പോഴും ഒക്കെ നാവു വായിൽ നിലത്തു  ഒട്ടിയാണ്. എങ്കിലും ഇത്തിരി കഴിയുമ്പോഴേക്കും അറ്റം പിടിച്ചു കെട്ടുന്ന ഈ കെട്ടു പതിയെ പുറകോട്ട് മാറി നാവിന്റെ ചലനത്തെ ഒട്ടുമേ ബാധിക്കാതെ ആവും.
നവജാത ശിശുവിൽ നിന്ന് മാസങ്ങൾ കഴിയുമ്പോഴേക്കും ഇതൊരു പ്രശ്നമേ അല്ലാത്ത വിധം പുറകിൽ ഒരിത്തിരി നേരിയൊരു പാട മാത്രമായി മാറും. പക്ഷെ ചിലരിൽ ഈ കെട്ടു അതേപടി തുടരും. ഇത് എത്രമാത്രം എന്നത് ഏറിയും കുറഞ്ഞും ഇരിക്കും.
ചില കുഞ്ഞുങ്ങളിൽ നാവു ഒട്ടുമേ മേലോട്ട് വരാത്ത വിധം ഒട്ടിപ്പിടിച്ചിരിക്കുന്നു എങ്കിൽ മറ്റു ചിലരിൽ ഇത്തരം ഒരു കെട്ടു കാണും എന്നതിനപ്പുറം ഒരു പ്രശ്നവും സൃഷ്ടിക്കാതെ പോവും. 

 ഏകദേശം 0.2 -  2 % കുട്ടികളിൽ കാണാം.  ചില ദേശങ്ങളിൽ കൂടിയും ചിലയിടത്തു കുറഞ്ഞും.
ആൺ കുട്ടികളിൽ ആണിത് ഇത്തിരി കൂടുതൽ.

വളരെ അപൂർവ്വം ആയി മറ്റു വൈകല്യങ്ങൾക്കൊപ്പം ഇങ്ങനെ കാണാറുണ്ട്. 

ഇത് കൊണ്ടെന്താണ് പ്രശ്നം ? ഇതൊക്കെ കാര്യമാക്കേണ്ടതുണ്ടോ ?

 വാക്കുകളുടെ ഉച്ചാരണത്തെ ബാധിക്കുമോ ?
എത്ര മാത്രം ?
നേരത്തെ കണ്ടു പിടിച്ചു ചികില്സിക്കേണ്ടേ ?

പണ്ടൊക്കെ ഞങ്ങൾ പറയാറ് "നാവിന്റെ കേട്ടല്ലേ ,അത് കൊണ്ട് സംസാരത്തിനു കുഴപ്പം ഒന്നും വരില്ല.അതിനു വേണ്ടി മാത്രം ഇടപെടൽ വേണ്ട." പക്ഷെ ഈയിടെയായി ഈയഭിപ്രായത്തിനു മാറ്റം വന്നിട്ടുണ്ട്. ചിലപ്പോഴെങ്കിലും ഇടപെടലുകൾ വേണ്ടതുണ്ട് എന്ന രീതിയിൽ. അതേക്കുറിച്ചു പറയും മുൻപ് ഈ കെട്ട് വാക്കുകളെ എങ്ങനെ മാറ്റുന്നു എന്ന് നോക്കാം

ശബ്ദവും വാക്കും ( ഇത്തിരി ശാസ്ത്രം )

ഇതേക്കുറിച്ചു ലളിതമായി പറയാൻ ഒരു നാടൻ ഹാർമോണിയം മതി.
 ഇടതു കൈവിരലുകൾ കൊണ്ട് ഇടവിട്ട് വലിച്ചു വിടുന്ന കാറ്റിന്റെ ശക്തിയാണ് ശബ്ദത്തിന്റെ ഏറ്റക്കുറച്ചിലുകൾ നിയന്ത്രിക്കുന്നത്. നമ്മുടെ ശ്വാസകോശം എന്ന ബലൂണിൽ നിന്ന് സ്വനപേടകത്തിലേക്കു (larynx ) വരുന്ന വായുവിന്റെ ഏറ്റക്കുറച്ചിലുകൾ നിയന്ത്രിക്കുന്നത് നെഞ്ചിലെ മസിലുകൾ.

ഈ വായുപ്രവാഹം നേരിയ തന്ത്രികളിൽ ഉണ്ടാക്കുന്ന സ്പന്ദനങ്ങൾ ആണ് ശബ്ദമായി മാറുന്നത്. അതിന്റെ നീളവും കട്ടിയും മാറുന്നതിനനുസരിച്ചു വ്യത്യസ്ത ആവൃത്തിയിൽ (ഉള്ള ശബ്ദങ്ങൾ പുറപ്പെടും) ഈ ശബ്ദങ്ങളെ വാക്കുകൾ ആക്കി മാറ്റുന്ന കലാകാരന്മാർ ആണ് നാവും,അണ്ണാക്കും നമ്മുടെ ചുണ്ടുകളും 

നമ്മൾ മലയാളം അക്ഷരമാല ഓർത്തു നോക്കൂ. 

അ , ആ   ഇ   ഈ   ഉ    ഊ , എ  ഏ  ഐ    ഒ   ഓ  ഔ അം അ .. ഈ സ്വരാക്ഷരങ്ങൾ പുറപ്പെടുവിക്കാൻ മേൽപ്പറഞ്ഞവരുടെ ( ചുണ്ട്,നാക്ക്,അണ്ണാക്ക് ) ഇടപെടലുകൾ ഇല്ലാതെ തന്നെ സാധ്യമാവും . ഏറ്റവും ലളിതം. 

പ ഫ ബ ഭ മ .. ഇവയും ഇവയുടെ കൂട്ടക്ഷരങ്ങളും , നമ്മളുടെ ചുണ്ടുകൾ മാത്രം വെച്ചാണ് ഉച്ചാരണം  (ഓഷ്ട്യങ്ങൾ labials ).

നമ്മുടെ സ്വന്തം സുരേഷ് ഗോപി ചേട്ടൻ പറയുന്ന "ഫ പുല്ലേ " എന്ന് പറയുമ്പോ "ഫ" ശരിക്കു വരില്ല. അങ്ങനെ ഒരാട്ട്‌ വെച്ച് കൊടുക്കാൻ ആ പാവത്തിന് ആവില്ല.

ക ഖ ഗ ഘ ങ്ങ .. അണ്ണാക്കിൽ നിന്ന് വരുന്നു. ഇവിടെ പ്രശ്നം വരുമ്പോ ചക്ക , ചങ്ങ ആവും. കാക്ക എന്നുച്ചരിക്കാൻ പ്രയാസപ്പെടും 

അപ്പൊ നാവോ?

നാവിന്റെ പ്രതിഭ

നമ്മൾ ഉച്ചരിക്കുന്ന ഒട്ടു മിക്ക അക്ഷരങ്ങളും നാവു മേൽപ്പല്ലുകളെയും മേലണ്ണാക്കിനെയും എങ്ങനെ ഏതു തരത്തിൽ ചെന്ന് തൊടുന്നു എന്നത് അനുസരിച്ചു . നമ്മൾ ലിംഗ്വൽസ് (linguals ) എന്ന് പറയും.

ഉദാഹരണം.

'ത,    ത്ത,    ദ,    ധ   ന .    ട,     ട്ട ,    ഡ,   ഡ്ഡ,  ണ'  സത്യത്തിൽ ഇക്കൂട്ടത്തിൽ( linguals ) ഏറെ ലളിതം ആണിവ.

ഇത്തിരി കൂടി ബുദ്ധിമുട്ടുള്ളവ ആണ്      'റ ,  ര' 

ഏറെ പ്രയാസം ഉള്ളവയും ഉണ്ടീ കൂട്ടത്തിൽ  'ശ ഷ സ ശ്ര സ്ര'.

നാക്ക്  വിചാരിച്ച പോലെ നീണ്ടു വരാതെ ഈ  കൂട്ടർക്ക് ഈ വാക്കുകൾ ഉച്ചരിക്കുന്നതിന് പ്രയാസം ഉണ്ടാവാം. 

ഇപ്പറഞ്ഞ ഉച്ചാരണ പിശകുകൾ നേരത്തെ കണ്ടറിഞ്ഞു തിരുത്തണം. അല്ലായെങ്കിൽ ഇത്തിരി വളരുമ്പോ വേണ്ടിടത്തു സ്പഷ്ടമായി വാക്കുകൾ ഉച്ചരിക്കാൻ പ്രയാസം നേരിടാം. 

പണ്ടൊക്കെ  പച്ചീർക്കിലി പാതികീറിവെക്കും,നാക്കു വടിക്കാൻ.
'അക്ഷര ശുദ്ധി'ക്ക്. 
വല്യ കാര്യമില്ല എന്നിപ്പോഴല്ലേ അറിഞ്ഞത്. 

വാക്കുകൾക്കപ്പുറത്തെ പ്രശ്നങ്ങൾ 

1. നവജാത ശിശുക്കളിൽ ചിലർക്ക് മുല കുടിക്കാൻ പ്രയാസം അനുഭവപ്പെടും. മുലഞെട്ടുകൾ വായ്ക്കകത്തേക്ക് എടുത്തു അണ്ണാക്കിൽ എത്തണം ശരിയായ രീതിയിൽ മുലപ്പാൽ കിട്ടാൻ.താഴെ ഒട്ടിപ്പിടിച്ചിരിക്കുമ്പോ ഉണ്ണിക്ക് ഇത് ഉള്ളിലേക്ക് കൊണ്ട് വരാൻ ഇത്തിരി ബുദ്ധിമുട്ടും. കിട്ടാതിരിക്കുമ്പോ വാശിയാവും കരച്ചിൽ ആവും. ഒടുക്കം മുലയൂട്ടൽ ഉപേക്ഷിച്ചു അമ്മമാർ പാൽ കുപ്പിയെടുത്തു വായിലേക്ക് ചെലുത്തും. ഈയൊരു പ്രശ്നം നിമിത്തം മുലപ്പാലിന്റെ ഗുണങ്ങൾ അവനു കിട്ടാതെ പോവും. 
2. പല്ലു വരുമ്പോ ചിലപ്പോ താഴത്തെ നിരയിലെ പല്ലുകളെ ബാധിക്കാം. ചിലപ്പോ പുറകോട്ടൊരു പിടുത്തം ഉള്ളത് കൊണ്ട് മേലെ നിരയിലെ പല്ലുകളെക്കാൾ ഇത്തിരി ദൂരം പുറകിൽ ആവും താഴത്തെ നിര. അങ്ങനെ ക്രോസ് ബൈറ്റ് ഉണ്ടാവാം 
3. നന്നേ ചെറിയ ക്ലാസ്സുകളിൽ നാക്കു കൊണ്ടും മൂക്ക് കൊണ്ടും ഒക്കെ ആംഗ്യം കാട്ടി കളിക്കുമ്പോൾ മറ്റുള്ളവർക്കൊപ്പം അങ്ങനെ കാട്ടാൻ ആവാതെ വിങ്ങിപൊട്ടലുകൾ ഉണ്ടാവാം 
4. ഇത്തിരി കൂടി വളരുമ്പോ ഒരു ഐസ് ക്രീം നുണയാൻ ആൾക്കൂട്ടത്തിൽ വെച്ച് പറ്റാതെ വരുമ്പോ നാണക്കേട് തോന്നാം 

അപ്പൊ ചികിത്സ ?

1. പലപ്പോഴും ഈയൊരവസ്ഥ ഒരു പ്രശ്നവും ഉണ്ടാക്കാതെ പോവും. വെറുതെ വിട്ടേക്കുക 
2. മേല്പ്പറഞ്ഞ പ്രശ്നങ്ങൾ ഉണ്ടാവുന്നു എങ്കിൽ ഇടപെടാം. 

സർജറി ?

കേട്ട് ഭയപ്പെടാൻ ഒന്നുമില്ല വെറും ഓ പി പ്രൊസീജിയർ . 

പണ്ടൊക്കെ ഓർക്കുന്നു വേദനക്ക് മരുന്ന് കൊടുക്കാതെ "വായൊന്നു തുറന്നേ മോൻ ,, നന്നായി , ഇനിയാ നാവൊന്നു നീട്ടിയേ " . രണ്ടു വിരലുകൾ നാവിനടിയിലേക്ക് ഈ നേരിയ പാടക്കിരുവശത്തേക്കും പോകും. മൂർച്ചയുള്ള കത്രിക കൊണ്ടൊരു കുഞ്ഞു വെട്ടു. കഴിഞ്ഞു. ചോര പൊടിയുന്നിടത്തു കോട്ടൺ വെച്ച് ഇത്തിരി കടിച്ചു പിടിച്ചു കഴിഞ്ഞാൽ അതും നിന്ന്. ഇത്രയേ ഉള്ളൂ 

പക്ഷെ 

ഇപ്പൊ ഓർക്കുമ്പോ അതൊരു ക്രൂരത ആയിരുന്നു. പച്ചക്കു ഇത്തിരി ആണെങ്കിലും അങ്ങ് മുറിക്കുക എന്നത്.

അത്യാവശ്യം വേണ്ട പരിശോധനകൾ ചെയ്യണം. 

എന്ന് വെച്ചാൽ, രക്ത സ്രാവം ഉണ്ടായേക്കാനിടയുള്ള സാധ്യത, മറ്റെന്തെകിലും ഒളിഞ്ഞിരിക്കുന്ന കുഴപ്പങ്ങൾ ഉണ്ടോ എന്നത് അറിയാൻ വേണ്ടി 

കുഞ്ഞിനായാലും അവനു വേദനിക്കും 

ആ വേദനയുടെ ഓർമ്മകൾ ഒരു പാട് കാലം നിൽക്കും 

അത് കൊണ്ട് വേദന ഇല്ലാതിരിക്കാനുള്ള സംവിധാനങ്ങൾ വേണം. 

എന്ത് തന്നെ ആയാലും കാലത്തു വന്നു ഉച്ചക്ക് തിരിയെ പോവാം. 

ഇത് ഏറ്റവും ലളിതം ആയ കേസുകൾ ആണ് പറഞ്ഞത്. 

ഇത്തിരി സംഗീർണ്ണത കൂടിയ നാക്കെട്ടുകൾ ഡെന്റൽ സർജനും പീഡിയാട്രിക് സർജനും ഒത്തൊരുമിച്ചു തീരുമാനിച്ചു ചെയ്യേണ്ട കേസുകളും ഉണ്ട് 

( Thanks to  Dr. Divya my Post graduate student for the photo and help)