phimosis

മലയാളത്തിന്റെ പ്രിയ കഥാകാരൻ വൈക്കം മുഹമ്മദ് ബഷീറിന്റെ ഭാഷയിൽ രണ്ടു ചെക്കന്മാരുടെ "കല്യാണ യന്ത്രം" ആണ് മേലെ ,
ആദ്യത്തേത് ഒരു രണ്ടു വയസ്സുകാരന്റെ .
രണ്ടാമത്തേത് ഇത്തിരി കൂടി മുതിർന്ന ആളിന്റെ.
"തൊലി പുറകോട്ട് നീങ്ങുന്നില്ല.ദ്വാരം കണ്ടില്ലേ തീരെ കുറവാ സാറേ" ആദ്യത്തെ ഉണ്ണിയുടെ അമ്മയുടെ പരാതി
രണ്ടാമത്തെ ആളിന്റെ 'അമ്മയുടെ പരാതി മറ്റൊന്നാണ്.
"ഉണ്ണിപ്പൂവിന്റെ സൈഡിൽ കണ്ടോ കുറച്ചു നാളായി ഇത്തിരി വലിപ്പത്തിൽ ഒരു മുഴ. കുറച്ചു ദിവസം കൊണ്ട് അവിടെ തൊടാൻ വിടുന്നില്ല നല്ല വേദന."
സത്യത്തിൽ ഈ രണ്ടു കല്യാണ യന്ത്രങ്ങളിൽ രണ്ടാമത്തെ യന്ത്രം വലിയ കുഴപ്പം ഇല്ലാത്തതായിരുന്നു.
തൊലി പുറകിലേക്ക് വരാത്തപ്പോ ഇടയിൽ സ്മെഗ്മ (smegma ) വന്നടിഞ്ഞു ഉണ്ടായ ചെറിയ തടിപ്പാണത്.
തൊലിയുടെ അറ്റം ആവശ്യത്തിനുള്ള ദ്വാരം ഉണ്ടായിരുന്നു.അമ്മമാർ കുളിപ്പിക്കുമ്പോ പതിയെ നീക്കി കഴുകി കൊടുത്തിരുന്നു എങ്കിൽ ഇത് ഒഴിവാകുമായിരുന്നു.
ആദ്യത്തെ ഉണ്ണിയുടെ അഗ്രചർമ്മം ഇത്തിരി പിശക് തന്നെ.
ദ്വാരം തീരെ കുറവ്. അഗ്രചർമ്മം ഗ്ലാൻസ് പെനിസിനോട് ഒട്ടിപ്പിടിച്ചു കിടപ്പാണ്. ഇവിടെ അമ്മമാർ ബലം പ്രയോഗിച്ചു പുറകോട്ടു ആക്കുന്നത് ബുദ്ധിയല്ല.

phimosis നെ കുറിച്ച് പറയും മുൻപ് ഇത്തിരി അടിസ്ഥാന കാര്യങ്ങൾ.

ഒരു തണ്ടിൽ (shaft ) അറ്റത്തൊരു കുടയും (glans penis ) പിടിച്ചാണ് കല്യാണ യന്ത്രത്തിന്റെ നിൽപ്പ്. കുടക്ക് ഊർന്നിറങ്ങുന്ന ഒരു പുതപ്പും (prepuse).
അഗ്രചർമ്മത്തിനു അറ്റത്തെ ദ്വാരം (meatus )
ഈ ദ്വാരം ഇത്തിരിയെ ഉള്ളൂ എങ്കിലും മൂത്രം ഉള്ളിൽ തടസ്സം ഒന്നുമില്ലെങ്കിൽ മൂത്രം പൂക്കുറ്റി പോലെ അകലേക്ക് തെറിക്കും.
പരിശോധിക്കുമ്പോ ഞങ്ങൾ ഡോക്ടർമാർക്ക് കിട്ടും ചിലപ്പോഴൊക്കെ ഇങ്ങനെ ഒരു സമ്മാനം.മുഖത്തേക്ക് തന്നെ.
"ഓ സമാധാനമായി ചെക്കന് പോസ്റ്റീരിയർ യൂറിത്രൽ വാൽവ് ഇല്ല.(posterior urethral valve )." എന്നുച്ചാൽ മൂത്രസഞ്ചിയിൽ നിന്ന് പുറത്തേക്കുള്ള തടസ്സത്തിന് പ്രധാന കാരണം.അങ്ങനെ ഒരു കുഴപ്പം എനിക്കില്ല ചേട്ടാ എന്ന് വിളിച്ചു പറയുന്നു ഈ പൂക്കുറ്റി. ഇത്തിരി മൂത്രം മൂക്കിലും വായിലും തെറിചാൽ എന്താ ഒരു ഡയഗ്നോസിസ് ആയില്ലേ .
 തീരെ ചെറിയ ദ്വാരം ആവുമ്പൊ (pinhole meatus ) ചിലപ്പോ ഈ അഗ്രചർമ്മം ബലൂൺ പോലെ വന്നു വീർക്കാറുണ്ട്.
പക്ഷെ ഇവിടെ മാത്രം ഉള്ള തടസ്സം വലിയ പ്രശ്നങ്ങൾ ഉണ്ടാക്കാറില്ല.
ഈ അഗ്രചർമ്മം ജനിക്കുമ്പോ ഉള്ളിലെ കുടപ്പനുമായി ഒട്ടിപ്പിടിച്ചു ആവും.
മിക്കപ്പോഴും രണ്ടു വയസ്സ് കഴിയും വരെ ഇങ്ങനെ ആവും.
അതിനു മുൻപ് ബലമായി തൊലി പുറകോട്ട് ശ്രമിക്കേണ്ടതില്ല.
അമ്മമാർ പലപ്പോഴും ഈയൊരു പരാതിയുമായി വരും.
ഇങ്ങനെ തൊലി പുറകിലേക്ക് വരാത്തത്  കൊണ്ട് ഈ കാലഘട്ടത്തിൽ പ്രത്യേകിച്ച് ഒരു കുഴപ്പവും ഉണ്ടാവില്ല. ചിലരിൽ ഇത്തിരി കൂടി വൈകി നാലോ ആറോ വയസ്സ് വരെ തൊലി ഗ്ലാൻസ് പെനിസിൽ ഒട്ടിപ്പിടിച്ചു തന്നെ ആവും പുറകോട്ടു മാറ്റാൻ ആവാതെ.
പക്ഷെ ഇവിടെ രണ്ടാമത്തെ ആളിന്റെ  അഗ്രചര്മത്തിന്റെ അറ്റത്തെ ദ്വാരം ആവശ്യത്തിന് വലുപ്പം ഉണ്ട്.

ഇനി ഫോട്ടോ നോക്കുമ്പോ രണ്ടു കാര്യങ്ങൾ  ശ്രദ്ധിക്കുക. 

ആദ്യത്തെ ഉണ്ണിയുടെ അഗ്രചർമ്മം ഗ്ലാൻസ് പെനിസുമായി ഒട്ടിപ്പിടിച്ചു തന്നെ.
അറ്റത്തെ ദ്വാരം തീരെ ചെറുത്.
ബലമായി തൊലി പുറകോട്ടു വലിച്ചാൽ തൊലി പൊട്ടാൻ ഇടയാക്കും.

രണ്ടാമത്തെ ആളിന്റെ അഗ്രചർമ്മം നീളമുണ്ട്‌,അറ്റം ആവശ്യത്തിന് ദ്വാരം ഉണ്ട് പക്ഷെ ഗ്ലാൻസ് പെനിസിനും അഗ്രചർമ്മത്തിനും  ഇടയിൽ വെളുത്തൊരു സാധനം വന്നു കൂടി ഒരു കൊച്ചു മുഴ രൂപപ്പെട്ടിരിക്കുന്നു.
ഈ കേസിൽ നേരത്തെ കുളിപ്പിക്കുമ്പോ പതിയെ തൊലി പുറകോട്ട് വലിച്ചു വൃത്തിയാക്കിയിരുന്നു എങ്കിൽ ഇങ്ങനെ വരില്ല.
ഒരു പാട് നാൾ വേദനയോ വിഷമങ്ങളോ ഇല്ലാതെ ഇങ്ങനെ നിൽക്കും
ചിലപ്പോൾ  ഇങ്ങനെ ( smegma ) കെട്ടിക്കിടന്നു വേദനയും പഴുപ്പ് ഉണ്ടാവും. ദുർഗന്ധത്തോടെ ഇത്തിരി പഴുപ്പ് പുറത്തേക്കും വരാം. 

ശ്രദ്ധിക്കേണ്ട കാര്യങ്ങൾ 

1. ആദ്യ വർഷങ്ങളിൽ തൊലി പുറകോട്ട് കൊണ്ട് വരാൻ ശ്രമിക്കാതിരിക്കുക. 
2. അഗ്രദ്വാരം തീരെ ചെറുത് (pinhole meatus ) ആയി മൂത്രം പോവുമ്പോ നൂല് പോലെ നേരിയ രീതിയിൽ ആയാലോ ബലൂൺ പോലെ വന്നു വീർക്കുകയോ ആണെങ്കിൽ ഡോക്ടറെ കാണണം 
3. അറ്റത്തെ ദ്വാരം ആദ്യത്തെ ഫോട്ടോയിൽ കാണും പോലെ ആണെങ്കിൽ നേരത്തെ ഡോക്ടറെ കാണണം.മിക്കപ്പോഴും രണ്ടു വയസ്സ് കഴിഞ്ഞാലും ഇത് തനിയെ നേരെയാവില്ല 
4. ഇത്തരം കേസുകളിൽ മേലെ കാണിച്ച മാതിരി മുഴകളോ വേദനയോ പഴുപ്പോ വന്നാൽ ഡോക്ടറെ കാട്ടണം
5. കുളിപ്പിക്കുമ്പോ ഈ ഭാഗങ്ങൾ ശ്രദ്ധിക്കണം,വൃത്തിയായി വെക്കണം.

ചികിത്സാരീതികൾ 

പഴുപ്പ് (balanitis /balanoposthitis ) ആയിട്ട് കണ്ടാൽ ഡോക്ടറുടെ നിർദ്ദേശപ്രകാരം ആന്റിബയോട്ടിക് ഔഷധങ്ങൾ കഴിക്കണം. ശ്രദ്ധയോടെ ഇടയിൽ ഉള്ള പഴുപ്പ് പുറത്തു കളയാൻ ഡോക്ടറുടെ സഹായം വേണം.

സ്റ്റിറോയിഡ് അടങ്ങിയ ഓയിന്റ്മെന്റുകൾ 

ഡോക്ടറുടെ നിർദ്ദേശപ്രകാരം മാത്രം ചില കേസുകളിൽ മൂന്നോ നാലോ ദിവസം സ്റ്റിറോയിഡ് അടങ്ങിയ ഓയിന്റ്മെന്റുകൾ പുരട്ടി വെച്ച ശേഷം ആഗ്ര ചർമ്മം എളുപ്പത്തിൽ പുറകോട്ടേക്കു കൊണ്ടുവരാൻ ആവും. ഓപ്പറേഷൻ ഇല്ലാതെ 

ഇത് പറ്റാത്ത  കേസുകളിൽ അഗ്രചര്മ്മഛേദം (circumcision ) ചെയ്യണം.
ഇതിനുള്ള സൗജന്യമായി നടത്താനുള്ള സൗകര്യം മിക്ക സർക്കാർ ആശുപത്രികളിലും ഉണ്ട്.

ഒരു കാര്യം ഓർക്കുക 

1. ആൺകുട്ടികളിൽ ചിലർക്ക് രക്തം കട്ടപിടിക്കാൻ ബുദ്ധിമുട്ടുള്ള കേസുകൾ പ്രത്യേകിച്ച് ഗൗരവമായ തരത്തിൽ ഉള്ളതല്ല എങ്കിൽ ചിലപ്പോ അറിയാതെ പോവാറുണ്ട്. ഇങ്ങനെ എന്തെങ്കിലും ഒക്കെ അവസരത്തിൽ ആവും തിരിച്ചറിയുന്നത്.
2. അപൂർവ്വം കേസുകളിൽ circumcision ചെയ്ത ശേഷം അമിത രക്തസ്രാവം കൊണ്ട് ബുദ്ധിമുട്ടും,  മരണവും വരെ സംഭവിച്ചിട്ടുണ്ട്.
3. അത് പോലെ തന്നെ പ്രതിരോധ കുത്തിവെപ്പുകൾ ചെയ്തിട്ടുണ്ട് എന്ന് ഉറപ്പും വരുത്തുക.
4. മതപരമായ ചടങ്ങിന്റെ ഭാഗമായി circumcision ചെയ്യുമ്പോഴും ഇക്കാര്യം മനസ്സിൽ വെക്കുന്നത് നന്ന്. അഗ്രചർമ്മ ഛേദം കഴിഞ്ഞു ഏതാനും മണിക്കൂറുകൾ എങ്കിലും ഡോക്ടറുടെ നോട്ടത്തിൻ കീഴിൽ ഉണ്ടാവുന്നത് നന്ന്.
5. അമ്പതു ശതമാനം കേസുകളിലും ഒരു വയസ്സ് ആവുമ്പോഴേക്കും അഗ്രചർമ്മം പുറകോട്ട് സുഖമായി വരും.മൂന്നു വയസ്സ് ആവുമ്പഴേക്കു തൊണ്ണൂറു ശതമാനം കേസുകളിലും.

ഈ കുറിപ്പിന്റെ പരിമിതി 

പ്രായമായവരിൽ phimosis ഉണ്ടാവുമ്പോ എന്തൊക്കെ ശ്രദ്ധിക്കണം എന്ത് ചെയ്യണം എന്നതിനെ കുറിച്ച് പറഞ്ഞിട്ടില്ല ഇവിടെ.
ഒരു ചിമിഴിൽ ഒതുക്കാവുന്ന ഇത്തിരി അറിവുകളേ ലക്ഷ്യമിട്ടുള്ളൂ.