പോളിയോ നിർമ്മാർജ്ജനം , പൾസ്‌ പോളിയോയുടെ പ്രസക്തി ,വേറിട്ടൊരു ചിന്ത

ഒരു വർഷം മുൻപ് ഇങ്ങനെ ഒരു കുറിപ്പ് എഴുതാൻ ഞാൻ മുതിരില്ലായിരുന്നു.

എഴുതുന്ന ഓരോ വാക്കും തപ്പിയെടുത്തു രോഗപ്രതിരോധ പദ്ധതികൾക്കെതിരെ വീശാൻ വാളുമായി കുറെ ഏറെ പേർ കച്ചകെട്ടി ഇവിടെ ഉണ്ടായിരുന്നു. വായിൽ തോന്നിയ വിഡ്ഢിത്തങ്ങൾ വെറുതെ വിളിച്ചു പറയുന്നവർ തൊട്ടു അധികാരത്തിന്റെ ഉന്നതങ്ങളിൽ വിലസുന്നവർ വരെ.

ഇത്തിരി അഭിമാനത്തോടെ പറയാം എം. ആർ വാക്സിൻ കാമ്പയിൻ വിജയപ്രദമായി നടപ്പിലാക്കി കഴിഞ്ഞപ്പോഴേക്കും നമ്മൾ നേടിയെടുത്തത് ലക്ഷ്യമിട്ട എഴുപത്തി അഞ്ചു ലക്ഷത്തിൽ തൊണ്ണൂറ്റി ഒന്ന്  ശതമാനത്തിനും വാക്സിനേഷൻ നൽകി എന്നത് മാത്രമല്ല. അതിലും വലിയ മറ്റൊരു കാര്യം കൂടിയാണ്. എന്ത് മണ്ടത്തരവും ഇവിടെ ചിലവാകും എന്ന് കരുതിയിരുന്നവരെ ജനം പുറംകാലു കൊണ്ട് തട്ടിയെറിഞ്ഞിരിക്കുന്നു. ശാസ്ത്രാവബോധം ഉള്ള ,ശരി തിരിച്ചറിയുന്ന കേരളം നമുക്ക് തിരിയെ കിട്ടിയിരിക്കുന്നു.

ആധുനിക വൈദ്യശാസ്ത്രത്തിന്റെ രീതിയിൽ ഏതൊന്നിന്റെയും ശരി തെറ്റുകൾ വിശകലനം ചെയ്തു തെറ്റ് തിരുത്തി / ശരികൾ മെച്ചപ്പെടുത്തി മുന്നോട്ടു പോവുന്ന രീതി. അതിനാണ് മുതിരുന്നത്.ഇത് വരെ ചെയ്തതെല്ലാം തെറ്റായിരുന്നു എന്ന ഏറ്റുപറച്ചിലായി വ്യാഖ്യാനിക്കപ്പെടില്ല എന്ന് ഉറപ്പുള്ളത് കൊണ്ട് ഇപ്പോൾ ഈ എഴുത്തിനു മുതിരുന്നു.

ഒടുക്കം വരെ വായിക്കാൻ നേരം കുറവുള്ളവർക്കു എന്റെ കുറിപ്പിന്റെ കാതൽ ആദ്യമേ തന്നെ പറയാം

ലോകം പോളിയോ നിർമ്മാർജ്ജനം ലക്ഷ്യമിടുമ്പോൾ നമ്മൾ ഒപ്പമുണ്ട്, എന്നാൽ അത് നേടിയെടുക്കാനുള്ള നമ്മുടെ രീതികളിൽ ചില മാറ്റങ്ങൾ വേണം 

1. തൊണ്ണൂറ്റി അഞ്ചു മുതൽ നമ്മൾ തുടരുന്ന പൾസ് പോളിയോ നിർത്തണം 
2. വരും നാളുകളിൽ ഊന്നൽ കൊടുക്കേണ്ടത് ഇന്ജെക്റ്റബിൾ പോളിയോവിനു ആയിരിക്കണം.
3. ഏതു തളർച്ചയും റിപ്പോർട്ട് ചെയ്യാനും പ്രതിരോധ നടപടികൾ എടുക്കാനും ജാഗ്രതയോടെ നടത്തുന്ന പോളിയോ സർവേലൻസ് തുടരണം 
4. ഇന്ത്യയിൽ ഓരോ വർഷവും പതിനേഴു കോടി കുഞ്ഞുങ്ങൾക്ക് രണ്ടു തവണ പൾസ്‌ പോളിയോ കൊടുക്കാൻ  ( മുപ്പത്തി നാല് കോടി ഡോസ് ) ചിലവഴിക്കുന്ന സാമ്പത്തിക ചിലവും എത്രയോ ആരോഗ്യ പ്രവർത്തകരുടെ ശ്രമവും ഇതിൽ പറഞ്ഞ രണ്ടാമത്തെ വഴിയിലേക്ക് തിരിച്ചു വിടണം.

അൽപം ചരിത്രം.

നൂറ്റാണ്ടുകളായി മരണം വിതച്ചിരുന്ന വസൂരി നിർമ്മാർജ്ജനം ഒരു വാക്സിൻ ഉപയോഗിച്ച് നേടാനായി എന്നത് ആർക്കും വിശ്വസിക്കാൻ ആവാത്ത ഒന്നായിരുന്നു.

http://images.slideplayer.com/34/8330240/slides/slide_3.jpg

ഈ  വിജയം ആണ് സമാനമായി മരണവും അംഗവൈകല്യങ്ങളും സമ്മാനിച്ച മറ്റൊരു രോഗത്തെ കീഴ്പ്പെടുത്താൻ ആവും എന്ന സ്വപ്നത്തിനു വിത്ത് പാകിയത്.വസൂരി ഉണ്ടാക്കുന്ന വൈറസ്സിനും പോളിയോ വൈറസ്സിനും ഉള്ള സമാനതകൾ ആണ് അന്നത്തെ വിദഗ്ദ്ധർ കണക്കിലെടുത്തത്.

1. മനുഷ്യരെ മാത്രമേ ബാധിക്കൂ 
2. മറ്റേതെങ്കിലും ജീവജാലം ഇതിന്റെ വാഹകർ ആയി ഇല്ല ഉദാ കൊതുക് 
3. ഫലപ്രദമായ വാക്സിൻ പോളിയൊക്കെതിരെ ഉണ്ട് തൊള്ളായിരത്തി .അൻപത്തി അഞ്ചു  മുതൽ ഇൻജെക്ട് ചെയ്യുന്ന വാക്സിൻ (salk ) ,അറുപത്തി മൂന്നു മുതൽ വായിലൂടെ കൊടുക്കുന്ന ഓറൽ പോളിയോ വാക്സിൻ (sabin )

തൊള്ളായിരത്തി എൺപത്തി എട്ടിൽ വേൾഡ് ഹെൽത്ത് അസ്സംബ്ലി  ലോക പോളിയോ വിമുക്തം ആക്കാനുള്ള പദ്ധതികൾക്ക് തുടക്കം കുറിച്ചു. UNICEF ,CDC,ROTARY INTERNATIONAL ,MELINDA GATE FOUNDATION ഒപ്പം ചേർന്നു.

രണ്ടായിരാമാണ്ടിൽ പോളിയോ വിമുക്ത ലോകം സ്വപ്നം കണ്ടെങ്കിലും,കയ്യെത്തി പിടിക്കാവുന്നിടത്തു നിന്ന് തെന്നി മാറി കൊണ്ടേയിരുന്നു. 

തൊണ്ണൂറ്റി അഞ്ചു മുതൽ നമ്മൾ പ്രധാനമായി മൂന്നു രീതികൾ ആണ് പോളിയോ നിർമ്മാർജ്ജനത്തിനു വേണ്ടി അനുവർത്തിച്ചത്. 

1. എഴുപത്തി എട്ടു മുതൽ ദേശീയ രോഗപ്രതിരോധ പട്ടികയുടെ നൽകുന്ന ഓറൽ പോളിയോ വാക്സിനുകൾ കൂടുതൽ ഫലപ്രദമായി എല്ലാവരിലും എത്തിക്കുക ( routine immunisation)
2. പൾസ്‌ പോളിയോ.
3. പോളിയോ സർവൈലൻസ് 

എൺപതുകളിൽ ഡോക്ടർ ജെക്കബ് ജോൺ പരീക്ഷണ അടിസ്ഥാനത്തിൽ വെല്ലൂരിൽ പൾസ്‌ പോളിയോ പ്രയോഗത്തിൽ വരുത്തുകയും വിജയിക്കുകയും ചെയ്തിരുന്നു. ഇതേ രീതി ദേശീയ അടിസ്ഥാനത്തിൽ കൊണ്ട് വന്നു. 

പൾസ്‌ പോളിയോ എന്നതിന്റെ അടിസ്ഥാനം 

രോഗം ഉണ്ടാക്കുന്ന മൂന്നു തരത്തിലുള്ള പോളിയോ രോഗാണുക്കളും ( wild virus )പെറ്റു പെരുകുന്നത് നമ്മുടെ വയറിൽ,പ്രത്യേകിച്ച് കുഞ്ഞുങ്ങളുടെ  , പുറത്തു ഓടകളിൽ കുറച്ചു നാൾ. വൈൽഡ് വൈറസുകൾ പ്രകൃതിയിൽ  ഏറ്റവും കുറഞ്ഞിരിക്കുന്ന ഡിസമ്പർ ജനുവരി മാസങ്ങളിൽ ഇന്ത്യയിൽ ആകമാനം ഉള്ള കുഞ്ഞുങ്ങൾക്ക് ഒരേ സമയം ഓറൽ പോളിയോ നൽകിയാൽ വൈൽഡ് വൈറസിന് നിൽക്കക്കളിയില്ലാതെ ആവും , വാക്സിൻ വൈറസ് ആ സ്ഥാനം പിടിക്കും. ഇതാണ് പൾസ്‌ പോളിയോയുടെ തത്വം. പിറന്ന നാൾ തൊട്ടു മൂന്നു വയസ്സ് വരെ ഉള്ള കുഞ്ഞുങ്ങൾക്ക് ആണ് ആദ്യ വര്ഷം ഇത് നൽകിയത് പിന്നീടിങ്ങോട്ട് എല്ലാ വർഷവും അഞ്ചു വയസ്സ് വരെ ഉള്ള കുഞ്ഞുങ്ങൾക്ക് പൾസ്‌ പോളിയോ കൊടുക്കുന്നു. ഇക്കുറി ജനുവരിയിലും മാർച്ചിലും ആയി മുപ്പത്തി നാല് കോടി ഡോസുകൾ.

പോളിയോ സർവെയ്‌ലൻസ് 

തളർച്ച ഏതു കാരണം കൊണ്ടായാലും അത് റിപ്പോർട്ട് ചെയ്യാനും അവയിൽ ഓരോന്നും പോളിയോ എന്ന രീതിയിൽ തന്നെ കണ്ടു വേണ്ട പ്രതിരോധ നടപടികൾ സ്വീകരിക്കാനും വേണ്ടി 'അക്യൂട്ട് ഫ്ലാസിഡ് പരാലിസിസ്' റിപ്പോർട്ടിംഗ് തുടങ്ങി.

ഈ മൂന്നു രീതികൾക്ക് ഫലം കണ്ടു 

പിള്ളവാതത്തിനു കാരണം ആയ മൂന്നു വൈറസ്സുകളിൽ പ്രധാനപ്പെട്ട ടൈപ് രണ്ടു (TYPE II ) തൊള്ളായിരത്തി തൊണ്ണൂറ്റി ഒൻപതിന് ശേഷം ലോകത്തിൽ നിന്ന് ഇല്ലാതെ ആയി. ഇന്ന് ടൈപ് രണ്ടു വൈറസിന് മറ്റൊരു പ്രസക്തി ഉണ്ട്.ഓറൽ പോളിയോ വാക്സിനിൽ നമ്മൾ ഉപയോഗിച്ചിരുന്ന മൂന്നു തരം വൈറസ്സുകളിൽ ഈ രണ്ടാം തരം ഇത്തിരി ജനിതക വ്യതിയാനം വന്നു ഇടയ്ക്കു പ്രശ്നം സൃഷ്ട്ടിക്കാൻ തുടങ്ങി.(V D P V  ie vaccine derived polio )

രണ്ടായിരത്തി പന്ത്രണ്ടു നവംബർ മാസത്തിനു ശേഷം പോളിയോ വൈറസ്സുകളിലെ മൂന്നാമൻ (TYPE III ) അപ്രത്യക്ഷ്യം ആയി.

കേരളത്തിൽ ഒരു പോളിയോ കേസ് റിപ്പോർട്ട് ചെയ്തത് രണ്ടായിരാമാണ്ടിൽ മലപ്പുറത്ത് കൊണ്ടോട്ടിയിൽ 

ഇന്ത്യയിൽ രണ്ടായിരത്തി പതിനൊന്നു ജനുവരി പതിമൂന്നിന് 

അതായതു പതിനെട്ടു കൊല്ലമായി കേരളത്തിലും ഏഴര കൊല്ലമായി ഭാരതത്തിലും പോളിയോ കേസുകൾ റിപ്പോർട്ട് ചെയ്യപ്പെട്ടിട്ടില്ല. ഈ വിജയങ്ങൾ നേടിയെടുക്കാൻ ആയതു മേൽപ്പറഞ്ഞ രീതികളിലൂടെ തന്നെ 

ഇന്ന് നമ്മൾ പേടിക്കുന്നതാരെ ?

പിള്ളവാതത്തിനു കാരണം ആയ മൂന്നു വൈറസ്സുകളിൽ ടൈപ് ഒന്ന് (Type I ) മാത്രമേ ഇന്ന് ലോകത്തു പോളിയോവിനു കാരണമായി ഉള്ളൂ .

വാക്സിൻ വൈറസ്സുകളിൽ ജനിതക മാറ്റം വന്ന വി ഡി പി വി ഏതാനും രാജ്യങ്ങളിൽ ഇപ്പോഴും ഓടകളിൽ ബാക്കി നിൽക്കുന്നു . അതിൽ മിക്കതും ഓറൽ വാക്സിനിലെ ടൈപ് രണ്ടു ആണ്.

പോളിയോ രോഗം ഉന്മൂലനം എന്ന ലക്‌ഷ്യം രണ്ടായിരത്തി പതിനൊന്നിൽ ഇന്ത്യ  കൈവരിച്ചു കഴിഞ്ഞു.

രണ്ടായിരത്തി പതിനാറിൽ   തൊണ്ണൂറ്റി രണ്ടു കേസുകൾ  വി ഡി പി വി കണ്ടെത്തി.മിക്കതും സിറിയയിൽ. മറ്റൊരു ആഫ്രിക്കൻ മേഖലയിലും.
പോളിയോ ഇല്ലാതായ ശേഷവും ഇന്ത്യയിൽ വി ഡി പി വി ഓടകളിൽ നിന്ന് വേര്തിരിച്ചെടുക്കപ്പെട്ടിരുന്നു 

രണ്ടായിരത്തി പതിനാറു വരെ .അതും കുറഞ്ഞു വന്നു. ഇന്ത്യയിൽ രണ്ടായിരത്തി പതിനേഴു മുതൽ വി ഡി പി വി  ഒരു കേസ് പോലും ഉണ്ടായിട്ടില്ല.
രണ്ടായിരത്തി ഒൻപതിൽ ഇരുപത്തി രണ്ടു കേസുകൾ,അത് പിന്നീട് കുറഞ്ഞു വന്നു.പതിനാലിൽ മൂന്നു കേസ്, പതിനഞ്ചിൽ രണ്ടു പതിനാറിൽ ഒരു കേസ്. അതിൽ പിന്നീട് പതിനേഴിലും പതിനെട്ടിലും ഒരൊറ്റ കേസ് വിഡിപിവി ഇന്ത്യയിൽ ഉണ്ടായില്ല

ലോകത്തു ഈ വർഷം  സെപ്റ്റംബർ ഇരുപത്തി അഞ്ചു വരെ റിപ്പോർട്ട് ചെയ്യപ്പെട്ടതു  വെറും പതിനെട്ടു  കേസുകൾ മാത്രം ആണ് .

അത്  രണ്ടു രാജ്യങ്ങളിൽ
ഇന്ന്പോളിയോ.അഫ്ഗാനിസ്ഥാനിൽ പതിനാലും   പാകിസ്ഥാനിൽ നാല് കേസുകൾ  ആണ് 2018 

ലോകത്തു ആകെ വി ഡി പി വി ഈ വർഷം ഉണ്ടായതു. നാല് കേസുകൾ. ഇത്തിരി കൂടി ആഞ്ഞു പിടിച്ചാൽ മാസങ്ങൾ കൊണ്ട് പോളിയോ നിർമ്മാർജ്ജനം സാധ്യമാവും എന്ന അവസ്ഥ.

പോളിയോ എൻഡ് ഗെയിം സ്ട്രാറ്റജി .

രണ്ടായിരത്തി പതിമൂന്നു മുതൽ പതിനെട്ടു ആവുമ്പോഴേക്കും പോളിയോ എന്ന വിപത്തിനെ കെട്ടുകെട്ടിക്കാൻ ലോകജനത ആകെ കൈകോർത്തു പ്ലാനിടുകയാണ്. 

1. വൈൽഡ് വൈറസുകളും വാക്സിൻ വൈറസുകളും അപ്പാടെ ഇല്ലാതെ ആവണം 
2. ഓറൽ പോളിയോ വാക്സിന് പകരം കിൽഡ് വാക്സിൻ ഉപയോഗിക്കണം.ഇത് ഘട്ടം ഘട്ടമായി നടപ്പിലാക്കണം.
3. രണ്ടായിരത്തി പതിനാറു ഏപ്രിൽ ഇരുപത്തി അഞ്ചിന്   ഓറൽ പോളിയോയിൽ മാറ്റം വരുത്തിയിരുന്നു.മൂന്നു ഘടകങ്ങൾ ഉള്ളതിൽ രണ്ടു ഘടകങ്ങൾ മാത്രം ഉള്ള ഓറൽ പോളിയോ വാക്സിൻ മാത്രമേ ഇന്ന് ലോകത്തെവിടെയും കൊടുക്കുന്നുള്ളൂ.(Bivalant polio instead of Trivalant) അതും മുഴുവനായി നിർത്തണം,എങ്കിലേ വൈൽഡ് വൈറസ്സിനൊപ്പം വാക്സിൻ വൈറസുകളും ഇവിടെ നിന്ന് അപ്പാടെ പിഴുതു മാറ്റാൻ ആവൂ.

ഐ പി വി .ഇന്ത്യയിൽ 

രണ്ടായിരത്തി പതിനഞ്ചു സെപ്റ്റംബർ മാസം തൊട്ടു വടക്കൻ സംസ്ഥാനങ്ങളിൽ ആദ്യ ഘട്ടം തുടങ്ങിയപ്പോ മുഴുവൻ ഡോസും (
0.5 ml) മസിലിൽ (Intramuscular) കൊടുക്കുന്ന രീതി ആണ്.തെക്കൻ സംസ്ഥാനങ്ങളിൽ വന്നപ്പോഴേക്കും മറ്റൊരു രീതി ആറും പതിനാലും  ആഴ്ചകളിൽ തൊലിക്കടിയിൽ(Intradermal ).പല പഠനങ്ങളും ഈ രീതി  മതിയാവും എന്ന് കണ്ടെത്തിയിട്ടുണ്ട്.
വിമർശിക്കപ്പെടുന്നത് മറ്റു കാര്യങ്ങൾ ആണ് 

.തുടങ്ങിയ ആദ്യ നാളുകളിൽ വാക്സിൻ കുറവ് ഒരു കാരണം ആയി പറഞ്ഞിരുന്നു എങ്കിലും വർഷങ്ങൾ കഴിഞ്ഞിട്ടും പോരായ്‌മ പരിഹരിക്കപ്പെട്ടിട്ടില്ല. ഇതൊക്കെ കണ്ടറിഞ്ഞു ചെയ്യേണ്ട മേലധികാരികൾ ഇക്കാര്യം തീരെ മറന്ന മട്ടാണ്.രണ്ടായിരത്തി പതിനേഴു ഡിസെമ്പറിൽ ദേശീയ പ്രതിരോധ സാങ്കേതിക ഉപദേശക സമിതി (national technical committee on immunisation) ചർച്ചക്കെടുത്ത വിഷയങ്ങൾ മാത്രം മതി ഇക്കാര്യം മനസ്സിലാക്കാൻ. അവിടെ ചർച്ച ചെയ്യപ്പെട്ട പ്രധാന വിഷയം ഇന്ത്യയിൽ ഹ്യൂമൻ പാപ്പിലോമ വൈറസ് വാക്സിൻ കൊണ്ട് വരേണ്ട ആവശ്യങ്ങൾ ആയിരുന്നു.

3 ഏറ്റവും എടുത്തു പറയേണ്ട പോരായ്മ ഇത് സർക്കാർ ആശുപത്രിയിൽ വെച്ച് മാത്രം കൊടുക്കപ്പെടുന്നു എന്നത് 

സ്വാകാര്യ ആശുപത്രിയിൽ ആദ്യ ഡോസുകൾ എടുത്ത കുഞ്ഞുങ്ങളെ ഈ വാക്സിൻ എടുക്കാൻ വേണ്ടി മാത്രം സർക്കാർ ആശുപത്രിയിലേക്ക് കൊണ്ട് പോകണം എന്നത് കൊണ്ട് മാത്രം വാക്സിൻ എടുക്കാതെ തിരിയെ പോവുന്നു

മിക്കപ്പോഴും മറ്റൊരു കച്ചവടം കൂടി നടക്കുന്നു. സ്വകാര്യ ആശുപത്രികളിൽ വെച്ച് ഇന്ജെക്റ്റബിൾ പോളിയോ ഫുൾ ഡോസ് മൂന്നു തവണ അല്ലെങ്കിൽ ഇന്ജെക്റ്റബിൾ പോളിയോ അടങ്ങിയ ഹെക്സവാല്നട്ട് വാക്സിൻ എടുക്കപ്പെടുന്നു. പലപ്പോഴും ഈ വാക്സിൻ ഈ പ്രായത്തിൽ ഗുണം കുറവ് എന്ന് വ്യക്തമായ അസെല്ലുലാർ പെർട്ടൂസിസ് അടങ്ങിയ വാക്സിൻ ആണെന്നത് മറ്റൊരു കാര്യം.

പൾസ്‌ പോളിയോ തുടരണോ ?

ന്യായ വാദങ്ങൾ 

• രണ്ടായിരത്തി ഒന്ന് മുതൽ ഇങ്ങോട്ടു പോളിയോ നിശ്ശേഷം ഇല്ലാതെ ആയിടത്തു പിന്നീട് നാൽപ്പത്തി ഒന്ന് രാജ്യങ്ങളിൽ പോളിയോ ഉണ്ടായി 
• പോളിയോ ഇല്ലാത്ത പത്തു വര്ഷങ്ങള്ക്കു ശേഷം ചൈനയിൽ സിൻജിയാങ് പ്രവിശ്യയിൽ രണ്ടായിരത്തി പതിനൊന്നിൽ ഇരുപത്തി ഒന്ന് പോളിയോ കേസുകളും രണ്ടു മരണങ്ങളും ഉണ്ടായി.ഇവിടെ വൈറസ് പാകിസ്ഥാനിൽ നിന്ന് എത്തിച്ചേർന്നു എന്ന് തെളിഞ്ഞു 
• രണ്ടായിരത്തി ഒൻപതിൽ പോളിയോ തീരെ ഇല്ലാതെ ഇരുന്ന തേജികിസ്താനിൽ അഞ്ഞൂറിന് മേലെ കേസുകൾ ഉണ്ടായി.ഇത് അന്ന് ഇന്ത്യയിൽ നിന്ന് ചെന്നെത്തിയതായി തെളിഞ്ഞു 

എത്ര കുറവാണെങ്കിലും അയൽരാജ്യങ്ങളിൽ രണ്ടിൽ പോളിയോ ഉള്ളിടത്തോളം ഇത് വരെ തുടർന്നിരുന്ന രീതികൾ അതെ പടി തുടരുന്നതാവും സുരക്ഷിതം.

മറുവാദങ്ങൾ 

പോളിയോ നിർമ്മാർജ്ജന ശ്രമങ്ങൾ എല്ലാം നിർത്തണം എന്നതല്ല അവിടെ മാറ്റങ്ങൾ വേണം എന്നതാണ് 

,നിർമ്മാർജ്ജനത്തിനു അനുവർത്തിച്ചു പോന്ന മൂന്നു രീതികളിൽ  ഊന്നൽ കൊടുക്കേണ്ടിടത്തു കൊടുക്കാതെ പോവുന്നതും തീരെ അപ്രധാനം ആയതിനു ഏറെ പ്രാധാന്യം കൊടുക്കുന്നതും തിരുത്തണം 

പോളിയോ വൈറസ് ഇന്ത്യയിൽ നിന്ന് റിപ്പോർട്ട് ചെയ്യപ്പെട്ടു ഏഴു വർഷം ആയിരിക്കെ, ഇല്ലാത്ത ഒന്നിനെ തുരത്താൻ വേണ്ടി മാത്രം പതിനേഴു കോടി ഓറൽ പോളിയോ ഡോസ് ഇവിടെ ഒഴുക്കണോ ? അതിനു വേണ്ടി ഉള്ള സാമ്പത്തിക മനുഷ്യ വിഭവ ശേഷി മറ്റു വഴികളിൽ തിരിച്ചു വിടുന്നതാവില്ലേ ബുദ്ധി. 

ലോകത്തു നിന്ന് പോളിയോ നിർമ്മാർജ്ജനം ചെയ്യാൻ ഏറെ പ്രാധാന്യത്തോടെ ലോകം കാണുന്ന ഇന്ജെക്റ്റബിൾ പോളിയോ (I P V ) ഒന്നര വർഷമായി തുടങ്ങി എങ്കിലും അതുമായി മുന്നോട്ടുള്ള പോക്ക് ഒച്ചിന്റെ താളത്തിൽ ആണെന്നത് പറയാതെ വയ്യ.
ചുരുക്കി പറഞ്ഞാൽ വേണ്ടത്
ഇന്ജെക്റ്റബിൾ പോളിയോക്ക് പ്രാധാന്യം കൊടുത്തു കൊണ്ട് എല്ലാവരിലും എത്തിക്കുക
അത് വരെ ഓറൽ ബൈവാല്നട് പോളിയോ ശരിയായി കിട്ടാത്ത സംസ്ഥാനങ്ങളിൽ നല്ല കവറേജ് കൊടുക്കുക
പൾസ്‌ പോളിയോ നിർത്തുക