ഈ ക്ടാവിന്റെ നെലോളി കൊണ്ടൊരു തൊയിരം ഇല്ലാലോ

ഞങ്ങളുടെ ഇൻഫോക്ലിനിക്ക് കൂട്ടായ്മയിൽ ഏറ്റവും ഊർജ്ജസ്വലമായ ചെറുപ്പക്കാരൻ നെൽസൺ ജോസഫ് " ഡൊമിനിക്കിന്റെ "അച്ഛൻ ആയ ആദ്യ നാളുകളിൽ ഞാൻ എഴുതി വെച്ചൊരു ഒരു പോസ്റ്റ് ആണിത്. പോസ്റ്റ് ചെയ്യാൻ ഇത്തിരി വൈകി.ഇൻഫോക്ലിനിക്കിലെ ആയാലും സാമൂഹ്യ കാര്യങ്ങളിൽ ആയാലും ഫേസ് ബുക്കിൽ രാവും പകലും ചെലവഴിച്ചിരുന്ന ഒരാൾ ദിവസങ്ങളോളം മുങ്ങി. കുറെ ഏറെ ദിവസങ്ങൾ മഷിയിട്ടു നോക്കിയിട്ടും കാണാതായപ്പോഴാണ് കാര്യം തിരക്കിയത.ആദ്യ ദിവസം അച്ഛനായതിന്റെ സന്തോഷം . ഉണ്ണിയുടെ ആദ്യത്തെ സന്തോഷക്കരച്ചിൽ കേട്ട് പുളകം കൊണ്ടു.

പിറ്റേന്ന് പാതിയുറക്കത്തിൽ ഒന്ന് വിതുമ്പിയതും അതും കഴിഞ്ഞു ചുണ്ടിന്റെ കോണിൽ ഒരു കുഞ്ഞിച്ചിരി വിരിഞ്ഞതും നോക്കി ആസ്വദിച്ചു .പുതുമഴക്കൊടുവിൽ വെയിൽ ഉദിച്ച പോലെ .അതും കഴിഞ്ഞു വന്ന ദിവസങ്ങളിൽ പതിയെ പതിയെ കൊച്ചു കള്ളൻ ഉറങ്ങാത്ത രാത്രികൾ സമ്മാനിച്ച് തുടങ്ങി. രാവും പകലും ഉറക്കമില്ലാതൊരച്ഛന്റെ പെടാപ്പാടിൽ ഇൻഫോക്ലിനിക്കു മറന്നു.

ഫേസ് ബുക്കിൽ അനവരതം പോസ്റ്റിയിരുന്ന ആൾ ദിവസങ്ങളോളം അപ്രത്യക്ഷമായി.

എന്നും കൃത്യ സമയത്തു ജോലിക്കെത്തിയിരുന്ന ആളെ കാണാതെ ആവുമ്പൊ ജോലി സ്ഥലത്തു മുതലാളി തോളിൽ തട്ടി ചോദിക്കും.

“ ഈയിടെ ആയി ഇവിടെ ഒന്നും ഇല്ലേ മുഖത്ത് ക്ഷീണം ഉണ്ടല്ലോ. എന്തെങ്കിലും പ്രശ്നം ? “

“ഇല്ല സാർ. ഈയിടെ ആയി ഇത്തിരി ഉറക്കം കുറവാണ് “. ഇത്തിരി ജാള്യതയോടെ എങ്കിലും തുറന്നു സമ്മതിക്കും.കന്നി ഉണ്ണി പിറന്ന ഒരച്ഛന്റെ അനുഭവങ്ങളും തുടർന്നുണ്ടായ അന്വേഷണങ്ങളും ആണ് മേലെ പറഞ്ഞത്

ഇനി കേൾക്കൂ …

ഈ കുഞ്ഞുണ്ണികൾ ,കാര്യം എന്തെന്ന് പറഞ്ഞു തരാൻ അറിയാത്ത ഇത്തിരിക്കുട്ടന്മാർ ഞങ്ങൾ ഡോക്ടർമാർക്ക് തരുന്ന പണി. പുതിയതായി ഒരു ക്ലിനിക്കും തുറന്നു ബോർഡും വെച്ചിരിക്കുന്ന ഒരു “കുഞ്ഞു ഡോക്ടറുടെ മുന്നിലെ ആദ്യത്തെ കീറാമുട്ടി "നിർത്താതെ നെലോളിക്കുന്ന ക്ടാവ് തന്നെ ആവും.അത്തരം അവസ്ഥകളിൽ അലറി കരയുന്ന പിള്ളക്കൊപ്പം തള്ളയുടെ കരച്ചിലും മൂക്ക് പിഴിച്ചിലും.ഇതൊന്നും പോരാഞ്ഞു ഒപ്പം ഉള്ളവരുടെ ചൊറിച്ചിലും കൂടി ആവുമ്പൊ കരച്ചിലിന്റെ കാരണം ആലോചിക്കുന്ന മനസ്സ് കാലി. ആ നാളുകളിൽ ഇജ്‌ജാതി ‘നവജാത’ന്മാർക്ക് കൊടുക്കാൻ ഒന്നു രണ്ടു് ഒറ്റ മൂലികളേ ഉണ്ടായിരുന്നുള്ളു: "കോളിമെക്‌സ്‌ അല്ലെങ്കിൽ കാർമിസൈഡ് ഡ്രോപ്‌സ് ".കരച്ചിലിന്റെ കാരണം കണ്ടു പിടിക്കാനുള്ള തല ബ്ലാങ്ക് ആവുമ്പൊ “ കിം കരണീയം ? “ന്നുച്ചാൽ മറ്റെന്തു ഗതി. അറ്റകൈക്ക്‌ ഒരു പ്രയോഗം .ഭാഗ്യത്തിന് മിക്ക കേസുകളിലും ഇത്തിരി കഴിയുമ്പോ ചെക്കൻ ചിരിയും കളിയും ആവും.സത്യത്തിൽ ഈ അമ്മമാരേക്കാൾ ശ്വാസം നേരെ വീഴുന്നത് നമ്മൾക്കാവും .പക്ഷെ ഈ പ്രയോഗം ഫലിച്ചില്ല എങ്കിലോ ?അച്ഛനും അമ്മയും ഒപ്പം വരുന്ന ഗഡാഗഡിയന്മാരും ഇത്തിരി നേരം ഒക്കെ നമ്മളെ സഹിക്കും. പിന്നെ ഒരു ബക്കറ്റു നിറയെ തെറിയും ചളിയും വാരിയെറിഞ്ഞു “വിവരമുള്ളവന്റെ അടുത്തേക്ക് “ കൊണ്ട് പോവും.

ഒരു പാട് പരാജയങ്ങൾ ആയപ്പോ വാശി കൂടി. അങ്ങനെ വിട്ടാൽ പറ്റില്ലാലോ. വെറും ഇത്തിരിക്കുഞ്ഞൻമ്മാരുടെ കരച്ചിലിന്റെ മുൻപിൽ അടിയറവു പറഞ്ഞു പിന്തിരിയാൻ ഒരുക്കമായിരുന്നില്ല.ആ മേഖലയിൽ ഇത്തിരി കൂടുതൽ അറിയുന്നവരിൽ നിന്നും ഇത്തിരി വായനയിൽ നിന്നും ഒക്കെ കാര്യങ്ങൾ മനസ്സിലാക്കി.പിന്നീട് വന്ന ഓരോ കരച്ചിലും ഓരോ പാഠം ആയിരുന്നു. 

ആദ്യം നോക്കേണ്ടത് 

ആശ്വസിപ്പിച്ചാലും നിർത്താത്ത കരച്ചിലിന്റെ കാരണങ്ങൾ അന്വേഷിക്കുമ്പോ അതൊന്നു ചിട്ടപ്പെടുത്തി ചിന്തിക്കാം.

ജനിച്ച നാൾ തൊട്ടൊരു രണ്ടു മാസം കരച്ചിലിന്റെ കാരണമായി വിശപ്പ് ആവാം , മുലപ്പാൽ ശരിക്കു കിട്ടുന്നില്ലേ കൊടുക്കുന്ന രീതി ശരിയല്ലേ വിശന്നു കരച്ചിൽ ആണോ എന്നതൊക്കെ ആലോചിക്കാം . നനവുള്ള വസ്ത്രങ്ങളും ഷീറ്റുകളും . സുഖകരമല്ലാത്ത ചൂടോ തണുപ്പോ ഉള്ള ചുറ്റുപാടും മൂട്ടയും കൊതുകും ഒക്കെ തേടി തിരയാം .പരിചയമില്ലാത്ത ചുറ്റുപാടും ശബ്ദങ്ങളും ഒക്കെ.ഓർക്കുക കുഞ്ഞുങ്ങൾക്ക് വേണ്ട ചൂട് നമ്മൾക്ക് ഇത്തിരി അസ്വസ്ഥത ഉണ്ടാക്കുന്നത്ര ആണ് . ഒരിത്തിരി കൂടുതൽ .

"പനിയുള്ള കരച്ചിലും , പനി ഇല്ലാത്ത കരച്ചിലും" 

ഇങ്ങനെ രണ്ടു കൂട്ടമായി ആലോചിക്കാം 

പനിയില്ലാത്ത കരച്ചിൽ ആണ് മേലെ പറഞ്ഞ കാര്യങ്ങൾ ഒക്കെ.ഇനി പറയാൻ പോകുന്നതും.നന്നേ ചെറുപ്രായത്തിലുള്ളൊരു നെലോളിക്കുന്നതിനു ഉള്ള കാരണങ്ങളിൽ ആദ്യേം എടുത്തു പറയേണ്ട ഒന്ന്“ഈവനിംഗ് കോളിക്"

ഏകദേശം ഒരു മാസം പ്രായം ആവുമ്പൊ ,വൈകി ഒരു ആറേഴു മണി ആവുമ്പൊ തൊട്ടു തുടങ്ങും നെലോളി . മൂപ്പർ ഒരു പിടുത്തം പിടിച്ചാൽ ഒരു നാലഞ്ചു മിനുട്ടു. ആകെ ചൊകന്നു ചെമ്പരത്തി പൂ പോലെ ആവും. അമ്മയും കുഞ്ഞും അമ്മൂമ്മയും ഒപ്പം പിടിക്കും. അത് കഴിഞ്ഞു ഒരു ഇത്തിരി നേരം ശാന്തത, ചിലപ്പോൾ ഒരു വളി വിട്ടെന്നുമിരിക്കും.

പിന്നെ ചിരിക്കും കളിക്കും. പിന്നെയും കരച്ചിൽ. ഇതേ പിടുത്തം...

ഈ ഒരു പരിപാടി തുടരും ഒരു പതിനൊന്നു മണി വരെ. അതു കഴിഞ്ഞു സുഖ നിദ്ര. പിറ്റേന്ന് ആളുടെ മുഖത്ത് നോക്കിയാൽ പറയില്ല ഇങ്ങേരു ഇങ്ങനെ ഒരു കാര്യം കാട്ടിയിരുന്നു എന്ന്. 

വൈകീട്ട് പൂർവ്വാധികം ഉശിരോടെ പഴയ നടപടികളിലേക്ക് തിരിയും. 

ഇതാണ് “ഈവനിംഗ് കോളിക്.

ഇപ്പരിപാടി ചിലപ്പോ മൂന്നാലു മാസം വരെ തുടരും. മറ്റൊരു കുഴപ്പവും ഇല്ല. തൂക്കം കൂടും ,ചിരിക്കും കരയും "വളിപ്പടിക്കും" ഒക്കെ സാധാരണ പോലെ..

ട്രൗസർ അഴിച്ചു നോക്കണം 

പനി ഇല്ലാതെ കരച്ചിലുകളിൽ മറന്നു കൂടാത്തൊരു കാര്യം “കല്യാണ യന്ത്രത്തിനു ചുറ്റും ചിലപ്പോ നൂലോ രോമമോ കുടുങ്ങി ഉണ്ടാവുന്ന പ്രശ്നം .രക്തം ഓട്ടം ഒഴുക്ക് കുറഞ്ഞു ആകെ നീലനിറം ആവും. ഇത് പോലെ തന്നെ ഉണ്ണിവിരലുകളും ചിലപ്പോ പെട്ടുപോവാറുണ്ട്.

കല്യാണ  യന്ത്രത്തിന് പുറകിലും ഒരു നോട്ടം വേണം, മണികൾ 

ചിലപ്പോ മണികൾ തിരിഞ്ഞു ചുവന്നു നീര് വന്നു കിടക്കുന്നുണ്ടാവും . തണ്ടിൽ കെട്ടിത്തൂക്കിയ രീതിയിൽ ആണ് മണികൾ .തണ്ടൊന്നു പിരിഞ്ഞാൽ തണ്ടിലൂടെ വരുന്ന രക്തക്കുഴലുകൾ ബ്ലോക്ക് ആവും. "ടോർഷൻ ടെസ്റ്റിസ്" എന്ന് പറയും. നേരത്തെ ഈയൊരു സംശയം ഉണ്ടായാൽ  ഒരു സ്കാനിങ് കൊണ്ട് തിരിച്ചറിയാം.ഒട്ടും വൈകാതെ സർജ്ജറി ചെയ്യാൻ ആയാൽ മണികൾ പ്രവർത്തനക്ഷമതയോടെ വീണ്ടെടുക്കാം   ഇത്തിരി മണിക്കൂറുകൾ താമസിച്ചാൽ മണികൾ (ടെസ്റ്റിസ് ) നശിച്ചു പോവും

മലദ്വാരം 

എന്തായാലും ട്രൗസർ അഴിച്ചതല്ലേ മലദ്വാരത്തിനു ചുറ്റും ഒന്ന് നോക്കിക്കളയ്.
ചിലപ്പോ അവിടെയൊക്കെ  തൊലി പോയി ചുവന്നു കിടക്കുന്നുണ്ടാവും. നനവുണ്ടെങ്കിൽ  ഫങ്കസ് വന്നു ചൊറിയും നീറ്റലും കാണും. ഇക്കൂട്ടർക്ക് കൈ കൊണ്ട് ചൊറിയാൻ അറിയില്ല ,നമ്മളെ പോലെ. ഒരു വയസ്സോളം ഉള്ള കുട്ടികളിൽ ചിലർ രാത്രി മാത്രം എണീറ്റ് കരയുന്നതു കൃമികടി കൊണ്ടാവും. ഇവ രാത്രികാലങ്ങളിൽ മലദ്വാരത്തിൽ ഇഴഞ്ഞു വന്നു ചൊറിച്ചിൽ ഉണ്ടാക്കും .രാത്രി ട്രൗസർ അഴിച്ചു നോക്കുമ്പോ ചിലപ്പോ ഒന്ന് രണ്ടെണ്ണത്തിനെ അവിടെ കണ്ടു പിടിക്കാനും ആവും

“സെറിബ്രൽ ഇറിറ്റബിലിറ്റി “

പനിയില്ലാത്ത കരച്ചിലുകളിൽ ഒരു പിടിയും കിട്ടാതെ ഒന്നുണ്ട്.
നിർത്താത്ത കരച്ചിൽ കൊണ്ട് വശം കെട്ടു ആരെയൊക്കെയോ കാട്ടി ഒരു വിധം പ്രയോഗങ്ങൾ ഒക്കെ നടത്തി കഴിഞ്ഞ ശേഷം ആവും ഇവര് വന്നെത്തുന്നത്. മേലെ പറഞ്ഞ കാര്യങ്ങൾ ഒക്കെ പ്രയോഗിച്ചു കഴിഞ്ഞു.
"പിറന്നു വീണ നാൾ മുതൽ നമ്മളെ ഉറക്കിയിട്ടേ ഇല്ല. രാത്രിയെന്നോ പകലെന്നോ വ്യത്യാസം  ഇല്ല , ചിരി എന്നത് ഒരിക്കലും ഉണ്ടായില്ല. നാളുകളോളം നീണ്ടു നിൽക്കുന്ന കരച്ചിൽ.."
“സെറിബ്രൽ ഇറിറ്റബിലിറ്റി “. മിക്കപ്പോഴും പ്രസവ സമയത്തോ നവജാത സമയത്തോ എന്തെങ്കിലും കുഴപ്പങ്ങൾ ഉള്ളവർ ആവും.
ഇവർ മെല്ലെ മെല്ലെ സെറിബ്രൽ പാൽസി അവസ്ഥയിലേക്ക്  നടന്നടുക്കും.

കുടലിലെ ടെലസ്കോപ്പിങ് 

മൂന്നാലു മാസം ആവുമ്പോഴേക്കും കുഞ്ഞു വാവ , പതിയെ മോണകൾ കാട്ടി ചിരിച്ചു തുടങ്ങുന്നു. ആരെയും വശീകരിച്ചു വീഴ്‌ത്തുന്ന ചിരി , കൈകളിലേക്ക് മറഞ്ഞു വരുമ്പോൾ ഒഴിഞ്ഞു മാറാൻ ആവാത്ത വിധം ഏതു കരിങ്കൽഹൃദയനെയും ഒന്ന് മയപ്പെടുത്തുന്ന പ്രായത്തിലേക്കു എത്തുന്നു.
ഒരു നാല് മാസം. കളിച്ചു ചിരിച്ചോണ്ടിരുന്നയാൾ നുള്ളി നോവിച്ച പോലെ  അലറി വിളിക്കുന്നു. ഒരു രണ്ടു മിനുട്ടു കഴിഞ്ഞ പഴയ  പോലെ  ചിരി കളി.

അമ്മയും അച്ഛനും അമ്മൂമ്മയും അടി മുടി തിരയുന്നു.
“എടിയേ കുട്ടി നിന്റെ കയ്യീന്ന് വീണോ ? മൂത്ത കുഞ്ഞു ഒമാനിക്കുന്നതിനിടയിൽ എടുത്തോണ്ട് ഓടിയത് കണ്ടതാണ് അമ്മൂമ്മ. അവർ അങ്ങനെ ആലോചിച്ചതിൽ തെറ്റില്ല. സ്വന്തം കയ്യിൽ നിന്ന് വീണ കാര്യം അവസാനം വരെ മൂടി വെച്ച് പോസ്റ്റ് മോർട്ടത്തിൽ തലയ്ക്കു പുറകിൽ ഫ്രാക്ച്ചറും തലച്ചോറിൽ രക്തസ്രാവവും ഒക്കെ അനുഭവം ആണ്. ? അപ്പൊ.എല്ലാടത്തും തപ്പി നോക്കിയതിൽ തെറ്റില്ല
ഇത് പറയുമ്പോ പ്രത്യേകിച്ച് ഓർക്കേണ്ട ഒരു കാര്യം .നമ്മളെ പോലെ ആയിരിക്കില്ല എല്ലാരും. രണ്ടാനച്ഛൻമ്മാരുടെ കയ്യിൽ നിന്ന് ഉണ്ണികൾക്കു പണി കിട്ടാറുണ്ട്. കൈ പിടിച്ചു തിരിച്ചും കഴുത്തു ഞെരിച്ചും ഒക്കെ
ഉണ്ണിക്കൈകൾ പിടിച്ചു വലിച്ചെടുക്കുമ്പോൾ കണങ്കൈകൾ മെല്ലെ തെറ്റി പോകുന്ന ഒരവസ്ഥ ഉണ്ട്. അത് ഇത്തിരി കൂടി വലിയ കുട്ടികളിൽ ആണ് കേട്ടോ .“എവിടെയാ നീ കുട്ടീനെ കെടത്തിയത് , നെലത്താ “? ഇന്നലെ അതിലെ പഴുതാര ഇഴഞ്ഞു പോവുന്നത് കണ്ടതാണ് ഞാൻ. നോക്കെടീ അവിടെയാറ്റം കുത്തിയിട്ടുണ്ടാവോ ?
നമ്മൾ ആലോചിക്കേണ്ട ഒരു മാതിരി കാര്യങ്ങൾ ഒക്കെ ആലോചിച്ചു കഴിഞ്ഞു കാണും അമ്മൂമ്മമാർ.
നമ്മൾ മറക്കാതെ ചെയ്യേണ്ട ഒരു കാര്യം. നല്ല വെളിച്ചത്തിൽ കുപ്പായം നീക്കി വയറു നോക്കുക. കരയാതെ ഇരിക്കുമ്പോ മെല്ലെ തപ്പി നോക്കുക. ഒരുരുള കണക്കെ എന്തോ ഒന്നു കയ്യിൽ തടയുന്നോ എന്ന്. ? ഇപ്രായത്തിൽ ഏറെ പ്രധാനം ഉള്ള ഒന്ന് കുടലുകൾ പിരിഞ്ഞു തടസ്സം വരുന്ന കാര്യം ( ഇൻറ്റസസപ്‌ഷൻ എന്ന് പറയും നാക്കു വളയാത്തവർ പറഞ്ഞു ബുദ്ധിമുട്ടണ്ട. കുടൽമാലയിലെ കുഴൽ ടെലിസ്കോപ്പിങ് ആയി തടസ്സം വരുന്ന അവസ്ഥ )

ആദ്യത്തെ മാസങ്ങളിൽ അല്ല നാലഞ്ചു മാസം പ്രായമാവുമ്പോ കുറുക്കുകൾ കൊടുത്തു തുടങ്ങുന്ന പ്രായം തൊട്ടൊരു രണ്ടു വയസ്സ് വരെ .ഒരു കാരണവും കൂടാതെ വാവിട്ടു കരയും. ഇത്തിരി കഴിഞ്ഞു നിർത്തി കളിക്കും. വീണ്ടും ഇതേ പരിപാടി തുടരും . നേരത്തെ പറഞ്ഞ കോളിക് പോലെ അല്ല ഇത് .ഇത്തിരി കഴിയുമ്പോ ആൾ തീരെ അവശൻ ആവും.വയറു വീർക്കും രക്തം കലർന്നും കറുപ്പും ചുവപ്പും നിറത്തിൽ മലം പോവും.ഇത്തിരി കൂടി വൈകിയാൽ ഗൗരവം ആവും. ശസ്ത്രക്രിയ ചെയ്തും അതല്ലാത്ത ചില രീതികൾ കൊണ്ടും  ഇത് ചികിൽസിക്കാം
അൾട്രാ സൗണ്ട് മുറിയിൽ കൊണ്ട് പോയി മലദ്വാരത്തിലൂടെ സലൈൻ കയറ്റി സാവധാനം ഉള്ളിലേക്ക് കയറി വന്ന ചെറുകുടലിനെ തിരിയെ എത്തിക്കുന്ന രീതി ആണിതു.അധികം വൈകാതെ കുഞ്ഞുങ്ങൾ എത്തുകയാണെങ്കിൽ സർജ്ജറി ചെയ്യാതെ ഈ രീതിയിൽ നമ്മൾക്ക് ചെയ്യാൻ ആവും.ഈ ഒരു വിഡിയോ കണ്ടു നോക്കൂ.തൃശൂർ മെഡിക്കൽ കോളേജിലെ ശിശുശസ്ത്രക്രിയ വിഭാഗത്തിലെ വിദഗ്ധ ഡോക്ടർമാർ ആണിത് നടത്തുന്നത്.ഒപ്പം എന്റെ പീജി വിദ്യാർത്ഥികളും.ഞാൻ ഒരു കാഴ്ചക്കാരൻ മാത്രം.

ബ്രെത്ത് ഹോൾഡിങ് സ്പെൽ 

ആറു മാസം തൊട്ടു ഒരു നാല് വയസ്സ് വരെ ഉള്ള കാലഘട്ടത്തിൽ ആണിത് കാണാറ് .ഇക്കാര്യത്തെ കുറിച്ച് പിന്നീടൊരു പോസ്റ്റിൽ വിശദമായി എഴുതാം 

ഹൃദയസംബന്ധമായ കാരണങ്ങളും 

കരയുമ്പോൾ കുഞ്ഞിന് നീല നിറം ഉണ്ടാവുന്നത് ഹൃദയ വൈകല്യങ്ങൾ കൊണ്ടാവാം. അത്തരം ചില അവസ്ഥകളിൽ നിർത്താതെ കരച്ചിൽ കഴിഞ്ഞു നീലനിറം കൂടി ആകെ തളർന്നു വാടിപ്പോവുന്ന അവസ്ഥയുണ്ട് . ഇങ്ങനെ സംഭവിക്കുന്നു എങ്കിൽ വിദഗ്ധോപദേശം തേടണം 

കരച്ചിലും പനിയും 

ഇനി പറയാം രണ്ടാമത്തെ വിഭാഗം. കരച്ചിലും വാശിയും ഉള്ളവർക്ക് ഇത്തിരി മേക്കാച്ചിലും കൂടി ഉണ്ടെങ്കിൽ. കണ്ണൂരുകാര് പനിക്കു പറയുന്ന വാക്കാണ് മേക്കാച്ചിൽ.
തൊണ്ണൂറു ശതമാനവും ജലദോഷ പനി ആവും. കഴിഞ്ഞ ദിവസങ്ങളിൽ സന്തോഷങ്ങളിൽ പങ്കെടുക്കാൻ ആരൊക്കെ വന്നു എന്നൊരൊറ്റ ചോദ്യം പറഞ്ഞു തരും ഉത്തരം.
എട്ടു വീട്ടിൽ പിള്ളമാരും ഏഴയലത്തുള്ളവരും വിളിച്ചു വരുത്തിയവരും കേട്ടറിഞ്ഞവരും ഒക്കെ വന്നു കയ്യിൽ എടുത്തു മുത്തം തന്നു സമ്മാനിച്ച പനി.
ഇവിടെ മൂക്കൊലിപ്പുണ്ടെങ്കിൽ സമാധാനം: വൈറൽ ആണ് എന്നത് നൂറു തരം. മൂക്കൊലിപ്പുള്ള പനിയാണെങ്കിലും രണ്ടു കാര്യം മറക്കാതെ നോക്കണം

ഒന്ന് ചെവി.

 ചെവി പഴുപ്പ് . ഈ സാധ്യത മനസ്സിൽ ഓർത്തു ചെവി ശ്രദ്ധയോടെ നോക്കിയാലേ  ഇതറിയൂ . ഇത്തിരി വൈകിയാൽ കർണ്ണപടം  ചിലപ്പോ പൊട്ടിയൊഴുകാം.
(ഇനി പറയുന്ന കാര്യങ്ങൾ സാധാരണ ജനങ്ങൾ അറിയാൻ അല്ല, ഡോക്ടർമാർ ഞങ്ങൾ ഓർമ്മയിൽ വെക്കാൻ):
മൂക്കൊലിപ്പും പനിയുമായി തുടങ്ങി ചിലപ്പോ ന്യുമോണിയ അല്ലെങ്കിൽ അപൂർവം ഹൃദയമിടിപ്പിന്റെ തകരാറിൽ ആക്കുന്ന കാര്യങ്ങൾ ഒക്കെ ഉണ്ട്. ഈ കാര്യങ്ങൾ ചിലപ്പോ കാരണം ഇല്ലാതെ കരച്ചിൽ ആയി പ്രത്യക്ഷപ്പെടാം. വലിയ കാര്യങ്ങൾ പറഞ്ഞു പേടിപ്പിക്കുന്നോ എന്ന് ചോദിക്കണ്ട. ഒന്ന് സ്റ്റത്തു വെച്ച് നോക്കി അക്കാര്യം ഒന്ന് മനസ്സിൽ കരുതിയാൽ നന്ന്

മെനിഞ്ചൈറ്റിസ്അഥവാ  തലച്ചോറിന്റെ പഴുപ്പ് 

 'അമ്മ മുലയൂട്ടുമ്പോൾ നെഞ്ചിൽ സ്റ്റത്തു വെക്കാം. ഇടതു കൈ മൂര്ധാവിലും. ഇത്തിരി പൊന്തിയ മൂർധാവ്‌.. ശ്രദ്ധിക്കണം പനി ഉള്ള കുട്ടിയാണെങ്കിൽ മെനിഞ്ചൈറ്റിസ്, പനി തലച്ചോറിൽ രക്ത സ്രാവം. ഇതത്ര അപൂർവ്വ ആണെന്ന് പറയരുത്. വിറ്റമിൻ കെ എന്നതിന്റെ കുറവ് ചിലപ്പോ ലേറ്റ് ആയി ഇങ്ങനെ വരാം)
നെലോളിയുടെ ഇത്തിരിക്കാര്യങ്ങൾ ആണ് പറഞ്ഞത് .പറഞ്ഞതിലേറെ ഉണ്ടിനിയും പറയാൻ.